Nutellakökur

október 20, 2015október 1, 2020 ~ Svava ~ 3 athugasemd

Um helgina bakaði ég kökur sem vöktu gífurlega lukku hér á heimilinu. Uppskriftina fann ég á sænska kökublogginu Bakverk och fikastunder en þar er hún ein vinsælasta uppskrift bloggsins. Það kemur mér ekki á óvart því kökurnar eru dásamlegar og það tekur nánast enga stund að gera þær.

Ef þið hafið meiri sjálfsaga en við þá væri eflaust himneskt að bera þær fram með þeyttum rjóma og berjum, eins og mælt er með, en við vorum of gráðug! Næst ætla ég að prófa það…

Nutellakökur (uppskrift frá Bakverk och fikastunder)

2 eggjahvítur
2,5 dl flórsykur
0,5 dl hveiti
0,5 dl kakó
1 tsk vanillusykur
0,75 dl nutella

Hrærið eggjahvítum og flórsykri saman í um 1 mínútu. Hrærið kakó, hveiti, vanillusykri og nutella saman við. Notið tvær skeiðar til að gera 12 deigskammta á smjörpappírsklædda ofnplötu. Bakið við 175° í um 12 mínútur. Látið kökurnar kólna á ofnplötunni.

Vikumatseðill

október 18, 2015október 1, 2020 ~ Svava ~ Skrifa athugasemd

Þetta var nú meiri laugardagurinn, leiðindarveður og dagurinn nýttur í að sinna heimilisstörfum og versla inn. Æ það þýðir víst lítið að kvarta, það geta ekki alltaf verið jólin. Þvottakarfan er þó alla vega tóm, ísskápurinn fullur og heimilið hreint. Í dag ætla ég að drífa mig í göngutúr og hafa það síðan notalegt hér heima á meðan ég elda ekta haustmat, boeuf bourguignon. En fyrst ætla ég að gefa tillögu að matseðli fyrir komandi viku.

Vikumatseðill

Mánudagur: Fiskur í ljúffengri sósu

Þriðjudagur: Quiche Lorraine

Miðvikudagur: Pasta Alfredo

Fimmtudagur: Nautahakkschilli með cheddarskonsum

Föstudagur: Grilluð humarpizza

Með helgarkaffinu: Sænskar pönnukökur

Pasta með salami, ruccola, furuhnetum og parmesan

október 13, 2015október 1, 2020 ~ Svava ~ 2 athugasemd

Í síðustu viku gerðum við okkur glaðan miðvikudag, eða öllu heldur glatt miðvikudagskvöld. Við gerum það ósjaldan, enda vikan þá rúmlega hálfnuð og því kjörið tilefni til að gera vel við sig. Ég eldaði einfaldan pastarétt, bakaði brauð og opnaði hvítvínsflösku. Þegar ég bar réttinn fram hugsaði ég með mér að þetta væri nú hálf ómerkileg máltíð en átti fljótt eftir að skipta um skoðun. Við gátum ekki hætt að borða því rétturinn var svo góður og daginn eftir börðust strákarnir um það sem eftir var.

Til að gera góða máltíð betri má hafa í huga að það er mjög gott að bera pastaréttinn fram með nýbökuðu brauði og pestó. Það má þá jafnvel hræra smá pestói saman við pastað ef það er stemning fyrir því. Síðan er gott að eiga góðan parmesan til að rífa yfir og alls ekki spara hann. Og þar sem það fer hvítvín í réttinn er upplagt að bera hann fram með köldu hvítvínsglasi til að flaskan sé ekki opnuð til einskis…

Pasta með salami, ruccola, furuhnetum og parmesan (uppskrift fyrir 4-6)

1 rauðlaukur
3 hvítlauksrif
100 g salami (þunnt skorið, notið góða tegund)
1 poki furuhnetur
1 dl hvítvín
ólívuolía
250 g ostafyllt ferskt ravioli (4 formaggi)
150 g pasta
ruccola eftir smekk (2-3 góð handfylli)
parmesan (ekki spara hann)

Fínhakkið rauðlauk og hvítlauk og skerið salamisneiðarnar i fernt. Steikið lauk, hvítlauk, salami og furuhnetur í vel af ólívuolíu í 2 mínútur. Bætið hvítvíni á pönnuna og látið sjóða við vægan hita. Sjóðið pastað. Hellið smá af pastavatninu á pönnuna og bætið síðan soðnu pastanu líka á pönnuna. Blandið öllu vel saman. Setjið pastablönduna í skál og blandið ruccola saman við. Rífið vel af parmesan yfir og berið fram, gjarnan með hvítlauksbrauði.

Vikumatseðill

október 11, 2015október 1, 2020 ~ Svava ~ Skrifa athugasemd

Ég hef viljandi dregið úr innkaupum á matreiðslubókum upp á síðkastið þar sem ég hef varla pláss fyrir þær lengur, en þessa bók gat ég ekki staðist. Hún lofar góðu, er falleg og kostar á við tímarit (rétt undir 2.000 kr í Hagkaup), þannig að ég held að ég hafi gert góð kaup. Í kvöld ætla ég að gefa mér tíma til að skoða hana og finna uppskrift til að prófa.

Það er æðisleg helgi að baki með tveimur góðum göngum, pönnukökukaffi hjá mömmu og matarboði með vinafólki. Þvílíkt veður sem við fengum og dásamlegt að fá smá frí frá rigningunni sem hefur herjað á í vikunni. Helgin var því endurnærandi bæði fyrir líkama og sál. Kvöldið fer að hluta til í að pakka með strákunum sem eru að fara í fermingarfræðsluferð í Vatnaskóg í fyrramálið. Síðan þarf víst líka að plana komandi viku og gera vikumatseðil!

Vikumatseðill

Mánudagur: Fiskur með beikoni og eggjasósu

Þriðjudagur: Kjötbollur með mozzarella og basiliku

Miðvikudagur: Kjúklingasúpa með tómötum, karrý og epli

Fimmtudagur: Pasta með púrrulauk og beikoni

Föstudagur: Gratinerað taco

Með helgarkaffinu:Drømmekage

Mexíkóskt kjúklingalasagna

október 8, 2015október 1, 2020 ~ Svava ~ 8 athugasemd

Síðasta sunnudag dustaði ég rykið af uppskrift sem var í miklu uppáhaldi hjá mér hér áður fyrr. Ég komst að því að hún hefu elst vel og er enn jafn góð og mig minnti. Alveg æðislega góð.

Hér áður fyrr notaði ég uppskriftina við hvert tækifæri sem gafst og bauð upp á réttinn í afmælisveislum, saumaklúbbum og matarboðum. Hann vakti nefnilega alltaf lukku og gerir það greinilega enn. Við vorum sjö manns í mat, allir borðuðu vel og það varð samt smá afgangur þannig að rétturinn er drjúgur. Ég bar lasagnað fram með salati, nachos (svart Doritos, uppáhald!), sýrðum rjóma og guacamole. Súpergott og frábær helgarmatur!

Mexíkóskt kjúklingalasagna (uppskrift fyrir 6-8)

5-6 kjúklingabringur (þetta er ekki svo nákvæmt, einn poki af frosnum bringum er gott)
½ laukur
1 stór eða 2 litlar rauðar paprikur
1 bréf burritos kryddmix
2 krukkur af salsa sósu (medium eða sterkar, jafnvel ein af hvoru)
½ líter matreiðslurjómi
smá klípa af rjómaosti (má sleppa)
tortillur (1 pakki af minni gerðinni)
Mozzarella ostur

Skerið laukinn og paprikuna fínt og kjúklingabringurnar í litla bita. Hitið olíu á pönnu við miðlungsháan hita (ég nota stillingu 7 af 9). Steikið laukinn og paprikuna þar til byrjar að mýkjast, bætið þá kjúklingnum á pönnuna og steikið áfram. Hellið kryddinu yfir og steikið í smá stund til viðbótar. Hellið salsasósum og matreiðslurjóma yfir og látið suðuna koma upp. Hrærið rjómaosti saman við sé hann notaður. Látið sjóða saman í nokkrar mínútur.

Setjið tortillaköku í botn á eldföstu formi (það gæti þurft að klippa þær til þannig að þær passi betur). Setjið kjúklingasósuna yfir og síðan á víxl tortillakökur og kjúklingasósu. Endið á kjúklingasósunni. Stráið mozzarella osti yfir (mjög gott að nota ferskan) og inn í 180° heitan ofn þar til osturinn er bráðnaður og kominn með fallegan lit.

Kjúklingur í ostrusósu

október 6, 2015október 1, 2020 ~ Svava ~ 12 athugasemd

Fyrir helgi prófaði ég uppskrift af kjúklingi í ostrusósu sem vakti heldur betur lukku hér heima. Betra en á veitingastöðum segjum við sem vorum í mat (allir nema Malín). Klárlega nýtt uppáhald og algjör bjargvættur þegar ekki gefst tími til að standa í eldhúsinu. Það tekur styttri tíma að elda réttinn en að sækja take away.

Ég notaði saltaðar kajúhnetur og sleppti því að salta réttinn (kemur mjög vel út). Hneturnar bar ég fram sér þannig að hver og einn setti yfir réttinn sjálfur. Það má þó vel setja þær á pönnuna og láta þær hitna í réttinum. Ég mæli með að nota úrbeinuð kjúklingalæri, þau passa svo vel í þennan rétt. Það er t.d. hægt að kaupa þau frosin frá Rose Poultry.

Kjúklingur í ostrusósu (uppskriftin passar fyrir 4-6)

800 g úrbeinuð kjúklingalæri
1 brokkólíhaus
2 gulrætur
1/2 stór púrrulaukur
1 rauð paprika
2 hvítlauksrif
1 lítil flaska af ostrusósu (ég notaði frá Blue Dragon, í henni eru 150 ml)
1 ½ dl vatn
3 msk púðursykur
salt og pipar (ef þið teljið þörf á, smakkið fyrst)
um 200 g kasjúhnetur (saltaðar)

Skerið kjúklinginn í bita og steikið upp úr olíu á pönnu. Skerið brokkólí, gulrætur, papriku, púrrlauk í bita og fínhakkið hvítlaukinn. Bætið þessu á pönnuna og steikið áfram. Hrærið saman ostrusósu, vatni og púðursykri og hellið yfir. Látið sjóða í 7-8 mínútur eða þar til sósan hefur þykknað aðeins og kjúklingurinn er fulleldaður. Smakkið til með salti og pipar. Stráið kasjúhnetum yfir og berið fram (eða berið hneturnar fram í sér skál).

Vikumatseðill

október 4, 2015október 1, 2020 ~ Svava ~ 1 athugasemd

Þessi árstími þykir mér alltaf svo skemmtilegur. Haustloftið er svo brakandi ferskt og svo ótrúlega gott og endurnærandi að fara í göngutúra. Við göngum oft Elliðarárdalinn því þar er nánast alltaf gott veður en Heiðmörk, Hvaleyrarvatn og svæðið í kringum Helgarfell (það þarf ekki alltaf að fara upp fjallið heldur er líka skemmtilegt að ganga í kringum það) sækjum við líka í. Þegar við höfum verið á þeim slóðum endum við göngutúrana oftar en ekki á Súfistanum.

Annað sem mér þykir skemmtilegt við þennan árstíma er að verslanir fyllast af fallegum haustvörum. Ég ætla að sitja á mér þetta haustið þar sem ég náði að versla ágætlega af haustvörum á Spáni en bomsur fyrir veturinn og tvær notalegar peysur fengu að fylgja mér heim í vikunni. Það sem gerist líka alltaf á haustin er að ég ósjálfrátt fer að undirbúa heimilið fyrir veturinn. Fylli á kertalagerinn og kaupi eitthvað fallegt. Það þarf ekki að vera merkilegt, nýjar diskamottur, kertastjaka, lampa, gólfmottu…. bara eitthvað sem gerir heimilið notalegt. Þetta haustið langar mig einmitt í lampa til að hafa við hliðina á sófanum, ný vínglös og falleg skurðarbretti. Ég hef augastað á lampa og brettum, en er lítið fyrir skyndikaup og þarf því alltaf að velta þessu aðeins fyrir mér. Vínglösin hef ég fundið en þau fást ekki hér heima (alveg dæmigert!) og það virðist ekki auðsótt að fá þau send til Íslands. Leitin heldur því áfram. Annað sem breytist á haustinn er matarlöngunin, hún fer úr því að vilja léttari mat yfir í haustlega pottrétti sem fá gjarnan að sjóða lengi á eldavélinni, góð heimabökuð brauð og langar setur yfir kertaljósum við matarborðið.

Vikumatseðill

Mánudagur: Lax með mango chutney og pistasíuhnetum

Þriðjudagur: Spaghetti bolognese

Miðvikudagur: Blómkálssúpa

Fimmtudagur: Ofnsteiktur kjúklingur með kartöflumús og dásamlegri sósu

Föstudagur: Pretzelvafðar pylsur

Með helgarkaffinu: M&M kökulengjur

Mjúk kaffikaka með súkkulaðibitum og kanil

október 3, 2015október 1, 2020 ~ Svava ~ 2 athugasemd

Í kvöld ætlum við strákarnir út að borða og á Billy Elliot (örugglega síðust af öllum!) og því þarf ég ekki að huga að neinum mat fyrir kvöldið. Mér þykir það ljúft inn á milli en það hefur verið full mikið af ljúfa út-að-borða lífinu upp á síðkastið. Ekki að ég sé að kvarta (sko alls ekki!) en mér þykir bara svo gaman að elda heima um helgar. Á morgun er því því planið að bæta það upp með góðri sunnudagssteik og ég ætla að leggjast aðeins yfir uppskriftabækurnar í dag þar sem mig langar að prófa eitthvað nýtt.

Ég datt niður á svo góða kökuuppskrift hjá Smitten Kitchen um daginn og var ekki róleg fyrr en ég var búin að baka hana. Kakan er mjúk, dásamlega góð og passar stórvel með helgarkaffinu. Gunnar fékk sér 5 sneiðar á einu bretti og gaf henni bestu mögulegu einkunn. Tilvalinn helgarbakstur!

Mjúk kaffikaka með súkkulaðibitum og kanil (uppskrift frá Smitten Kitchen)

Botn:

½ bolli smjör við stofuhita (113 g)
1 ½ bolli sykur (300 g)
3 stór egg, hvítur og rauður aðskildar
1 ½ tsk vanilludropar
2 bollar sýrður rjómi
3 bollar hveiti (375 g)
1 tsk lyftiduft
1 ½ tsk matarsódi
¾ tsk salt

Fylling og toppur:

2 bollar súkkulaðibitar (ég notaði 2 poka af suðusúkkulaðidropum)
½ bolli sykur (100 g)
1 tsk kanill

Hitið ofninn í 175° og smyrjið skúffukökuform. Hrærið saman smjör og sykur, bætið eggjarauðum og vanilludropum saman við og hrærið áfram. Sigtið hveiti, matarsóda, lyftiduft og salt saman í sér skál. Hrærið á víxl sýrðum rjóma og hveitiblöndunni saman við deigið. Stífþeytið eggjahvítur og hrærið þeim að lokum varlega saman við deigið.

Hrærið saman sykur og kanil fyrir fyllinguna.

Setjið helminginn af deiginu í skúffukökuformið, stráið helmingnum af kanilsykurblöndunni yfir og 1 bolla af súkkulaðibitum. Setjið seinni helminginn af deiginu yfir og reynið að slétta úr því þannig að það hylji fyllinguna. Setjið það sem eftir var af kanilsykrinum yfir og seinni bollann af súkkulaðibitunum. Þrýstið létt með lófanum yfir súkkulaðibitana svo þeir festist í deiginu. Bakið í 40-50 mínútur, eða þar til prjónn sem stungið hefur verið í kökuna kemur hreinn upp.

Heimsins besta Sloppy Joe!

október 1, 2015október 1, 2020 ~ Svava ~ 8 athugasemd

Nú þegar styttist í helgina má ég til með að gefa uppskrift af æðislegum helgarmat. Ég gæti vel lifað á Sloppy Joe, hef prófað all margar uppskriftir og þessi er sú langbesta sem ég hef smakkað. Kjötsósan er svo bragðgóð að það nær engri átt! Hún er sett í hamborgarabrauð sem hafa verið smurð með smjöri og hituð í ofni þannig að þau fá stökka skorpu og verða mjúk að innan. Þið getið rétt ímyndað ykkar hvað þetta er gott, stökkt og mjúkt brauðið með bragðmikilli kjötsósunni. Svo brjálæðislega gott! Herlegheitin bar ég fram með djúpsteiktum frönskum, Hellmans mæjónesi, kokteilsósu og hrásalati. Ekta föstudagsmatur!

Það varð smá afgangur af kjötsósunni hjá okkur sem ég frysti. Hann endaði síðan ofan á pizzabotni eitt kvöldið þegar við komum seint heim og enginn tími gafst til að elda. Þá kom sér vel að eiga pizzadeigsrúllu í ískápnum sem ég smurði með pizzasósu, setti kjötsósuna yfir og vel af osti. Pizzuna bar ég síðan fram með hrásalati. Svakalega gott!

Sloppy Joe

3 msk smjör
½ bolli laukur, fínhakkaður
1 rauð paprika
1½ tsk hvítaukur, fínhakkaður
450 g nautahakk
2½ msk púðursykur
2 msk Dijon sinnep
2 msk Worcestershire sósa
1 msk chili krydd (þið getið byrjað á hálfri msk og smakkað ykkur áfram)
1 tsk reykt paprikukrydd
1 bolli tómatsósa
⅓ bolli eplaedik
salt og pipar
hamborgarabrauð til að bera réttinn fram í

Bræðið smjör á pönnu við miðlungsháan hita. Þegar smjörið hefur bráðnað er laukurinn settur á pönnuna og látinn mýkjast. Bætið papriku og hvítlauk á pönnuna og steikið í 1 mínútu (hrærið aðeins í á meðan). Bætið nautahakkinu á pönnuna og látið það brúnast aðeins (það tekur um 3 mínútur). Bætið púðursykri, Dijon sinnepi, worcestershire sósu, chilikryddi og reyktu paprikukryddi á pönnuna. Hrærið í og látið steikjast í hálfa mínútu, bætið þá tómatsósu og eplaediki út í. Látið sjóða saman í 5 mínútur og smakkið til með salti og pipar. Það má þá bera réttinn fram en því lengur sem hann fær að sjóða því betri verður rétturinn. Best er að leyfa honum að sjóða við vægan hita í klukkustund.

Smyrjið hamborgarabrauð með smjöri og hitið í ofni þar til brauðin hafa fengið stökka skorpu en eru mjúk að innan. Fyllið hamborgarabrauðin með nautahakkinu og berið fram.

Vikumatseðill

september 27, 2015október 1, 2020 ~ Svava ~ Skrifa athugasemd

Um síðustu helgi bakaði ég köku sem ég birti síðan mynd af á Instagram. Í gær fékk ég fyrirspurn um uppskriftina og eftir smá umhugsun taldi ég mig vissa um að ég hefði fundið hana hjá Smitten Kitchen. Í dag ætlaði ég að finna kökuna aftur en allt kemur fyrir ekki, kakan virðist horfin af internetinu! Eða að ég sé hreinlega búin að gleyma hvar ég fann uppskriftina. Þetta kennir mér að setja góðar uppskriftir strax hingað inn á bloggið því annars týni ég þeim.

Síðasta sunnudag skrifað ég að mig langaði svo í soðna lifrapylsu og í vikunni lét ég verða af því að sjóða lifrapylsu sem ég bar fram með heimagerðri kartöflumús og rófustöppu. Við buðum mömmu í mat og allir voru alsælir! Ódýr og einfaldur veislumatur. Það má kaupa lifrapylsuna frosna fyrir lítinn pening og því er þetta snjöll máltíð svona rétt fyrir mánaðarmótin. Krakkar elska þetta! En að máli málanna þennan sunnudaginn, nefnilega vikumaseðlinum. Ég vona að hann nýtist ykkur.

Vikumatseðill

Mánudagur: Þorskur í ljúffengri karrýsósu