Pulled pork í rjómasósu

september 24, 2015október 1, 2020 ~ Svava ~ Skrifa athugasemd

Ég þarf ekki að huga að neinum helgarmat þessa helgina þar sem ég fer út að borða og í bíó á föstudagskvöldinu, út að borða og á tónleika á laugardagskvöldinu og í saumaklúbb á sunnudagskvöldinu! Það eru ekki allar helgar svona vel bókaðar hjá mér, eins heimakær og ég nú er. Ég er þó með góða tillögu að helgarmat fyrir þá sem eru farnir að huga að helgarmatnum, hægeldaður svínahnakki í rjómasósu með kartöflum (brúnaðar er enn betra!), salati og rifsberjahlaupi. Ótrúlega einfalt og tekur örskamma stund að útbúa en þarf síðan að vera allan daginn í ofninum, þannig að þegar kjötið er tilbúið dettur það nánast í sundur. Þetta var helgarmaturinn okkar um síðustu helgi og þar sem strákarnir voru í afmæli á laugardagskvöldinu nýtti ég tækifærið og eldaði góðan skammt þá sem við gátum notið bæði laugardags- og sunnudagskvöld. Ég setti kjötið í ofninn strax um morguninn og um kvöldið var ekkert að gera nema að sjóða kartöflur og útbúa sósu úr soðinu. Einfalt og stórgott!

Pulled pork í rjómasósu (uppskrift frá Bakverk och fikastunder)

1 kg. svínahnakki í sneiðum
salt, svartur pipar, hvítur pipar og aromat
2 nautakjötsteningar
3 dl vatn

Kryddið svínahnakkasniðarnar og steikið síðan upp úr smjöri við háan hita þannig að kjötið fái fallega steikarhúð á öllum hliðum. Leggið í eldfast mót (bætið jafnvel smá meira af kryddi á). Hellið vatninu yfir pönnuna og bætið nautakjötsteningunum í. Látið suðuna koma upp og teningana leysast upp. Hellið vatninu af pönnunni yfir kjötið og setjið álpappír yfir formið (ef þið eigið ofnpott þá er upplagt að nota hann). Setjið í 130° heitan ofn í 8-10 klst.

Rjómasósa

krafturinn frá kjötinu (sem verður á botninum á mótinu eftir eldunina)
2,5 dl rjómi
ca 1 tsk. rifsberjahlaup
smá sykur
maizena til að þykkja sósuna

Setjið kjötkraftinn í pott og hrærið rjóma saman við. Látið sjóða saman í smá stund og smakkið til með rifsberjahlaupi og smá sykri (jafnvel smá hvítur pipar). Þykkið sósuna með Maizena mjöli.

Vikumatseðill

september 20, 2015október 1, 2020 ~ Svava ~ Skrifa athugasemd

Í vikunni birtist viðtal við mig í fylgiriti Viðskitpablaðsins, Eftir vinnu. Þegar ljósmyndin fyrir viðtalið var tekin lá ég í flensu og hálftíma áður en ljósmyndarinn kom lá ég í náttfötunum í sófanum og dauðsá eftir að hafa ekki afbókað hann. Sem svo oft áður kom Malín mér til bjargar, hún er SNILLINGUR í að farða og það er mikill lúxus að hafa eina slíka á heimilinu. Ég sat í náttfötunum, hálf sofandi, á meðan hún græjaði mig. Fimm mínútum áður en ljósmyndarinn kom hoppaði ég í föt (hélt reyndar að um andlitsmynd væri að ræða og var því lítið að velta því fyrir mér í hvað ég færi) og málið var leyst.

Ástæðan fyrir því að ég segi frá þessu er að ég hef fengið svo mörg hrós fyrir hvað ég er fínt máluð á myndinni og ég verð að segja að Malínu tókst vel að fela hvað ég var slöpp og kvefuð í augunum. Malín er á fullu fyrir öll skólaböll að farða vinkonur og kunningja og þegar eitthvað stendur til hjá þeim hafa þær iðulega samband og biðja hana að farða sig. Einnig farðar hún mig og ömmur sínar þegar okkur dettur í hug að lyfta okkur upp. Hún á hrós skilið fyrir dugnaðinn!

Annars að aðalatriðinu, matseði fyrir komandi viku. Ég vona að ykkur líki hann!

Vikumatseðill

Mánudagur: Ítalskur lax með fetaostasósu

Þriðjudagur: Ljúffengur kjöthleifur á pönnu

Miðvikudagur: Rjómalöguð kjúklingasúpa

Fimmtudagur: Pylsugratín með kartöflumús

Föstudagur: Grískur ofnréttur

Með helgarkaffinu: Kókoskúlur

Föstudagur!

september 18, 2015september 18, 2015 ~ Svava ~ Skrifa athugasemd

Það hefur verið þögn hér á blogginu upp á síðkastið og þeir sem fylgja mér á Instagram hafa kannski séð að ég hef verið í smá haustfríi. Við fórum til Spánar og framlengdum sumrinu aðeins í leiðinni. Það var yndislegt þrátt fyrir að ég náði mér í flensuskít sem virðist ekki ætla að fara úr mér. Alveg glatað!

Það kom mér á óvart hversu skemmtileg borg Alicante er. Ég áttaði mig á því að ég hef vanmetið hana stórlega. Þröngar götur, góðir veitingastaðir og hótelið okkar var frábærlega staðsett á ströndinni. Eftir viku í Alicante færðum við okkur til Calpe og þangað ætla ég að fara aftur. Við gistum á þessu hóteli sem var æðislegt í alla staði. Kampavínsbar, æðisleg sólbaðsaðstaða, einn besti morgunmatur sem við höfum fengið (úrvalið gaf valkvíða á háu stigi, himneskt eftirréttahlaðborð og í glösunum var ýmist cava, nýpressaður appelsínudjús eða nespressó) og frábærlega staðsett á ströndinni með veitingastaði allt um kring.

Eins gott og það er að fara í frí þá jafnast ekkert á við að koma aftur heim. Það sem ég saknaði krakkana! Helgin verður nýtt í að ná sér af veikindum (þetta er hálfgert flensubæli hér þessa dagana), fylla á ísskápinn og plana næstu viku. Okkur er farið að langa í heita lifrapylsu, kartöflumús og rófustöppu, kannski að það fari á matseðil komandi viku. Haustlegur matur og ég brýt eflaust allar reglur með því að bera hann fram með Egils appelsíni (það drekkur það þó enginn nema ég). Iss, að ég skuli segja frá þessu…

Æðislegir snickersbitar

september 2, 2015október 1, 2020 ~ Svava ~ 4 athugasemd

Ég sit hér heima undir teppi með beinverki og reyni hvað ég get að verða ekki veik. Malín er búin að vera veik í rúma viku og enn eru engin batamerki (hún var síðast hjá lækni í gær sem staðfesti að um mjög slæma vírussýkingu væri að ræða). Greyið er að missa svo mikið úr skólanum en hún hefur verið samviskusöm og náð að skila öllum verkefnum þrátt fyrir allt.

Á föstudaginn ætla ég í frí og því hentar mér sérlega illa að leggjast í flensu núna. Eins á ég von á ljósmyndara hingað í kvöld til að taka mynd af mér fyrir Viðskiptablaðið út af smá viðtali sem verður við mig þar. Sá á ekki auðvelt verkefni fyrir höndum! Helst langar mig bara til að draga teppið yfir þrútnu kvefaugun og biðja ljósmyndarann vel að lifa.

Ég ætla að nýta daginn í að hvíla mig, finna mér bækur til að lesa í fríinu og gefa ykkur uppskrift að æðislegum snickersbitum sem tekur enga stund að gera en hverfa því miður allt of fljótt í mannskapinn. Og fyrst ég er í bókapælingum ætla ég líka að mæla með tveimur bókum sem ég las í sumar, Konan í lestinni eftir Paulu Hawkins (#1 New York Times bestseller) og Ég fremur en þú eftir Jojo Moyes (ég las hana á sænsku, sem útskýrir sænska titilinn) sem er líka New York Times bestseller með yfir 5 milljón seld eintök. Þær eru ólíkar en ég hafði gaman af þeim báðum. Þriðja bókin á myndinni, The Power of Now eftir Eckhart Tolle, er alltaf á náttborðinu mínu og mætti eflaust vera á flestum náttborðum.

Snickersbitar

1 krukka hnetusmjör ca 350g
1 1/2 dl sýróp
1 dl sykur
9 dl cornflakes
1 tsk vanillusykur
1 dl kókosmjöl
2 pokar dökkur hjúpur (hjúpdropar, samtals 300 g)

Bræðið hnetusmjör, sýróp og sykur saman í potti. Blandan á bara að bráðna saman en ekki sjóða. Blandið cornflakes, kókosmjöli og vanillusykri saman í skál. Blandið öllu saman og þrýstið í botn á smjörpappírsklæddu skúffukökuformi. Látið kólna. Bræðið súkkulaðið og setjið yfir. Látið harðna og skerið síðan í lekkera bita.

Vikumatseðill

ágúst 30, 2015október 1, 2020 ~ Svava ~ Skrifa athugasemd

Þá er sunnudagur enn og aftur runninn upp og ekki seinna vænna en að plana komandi viku. Til að allt gangi sem best fyrir sig þá er vikumatseðillinn á sínum stað, enda þykir mér alltaf jafn góð tilfinning að vera með ísskápinn fullan fyrir vikuna og vera búin að plana kvöldverðina. Það er hversdagslúxus!

Vikumatseðill

Mánudagur: Steiktur fiskur í parmesanraspi

Þriðjudagur: Spaghetti bolognese

Miðvikudagur: Sveppasúpa

Fimmtudagur: Kjúklingagratín með tómat- og ostasósu

Föstudagur: Heimagerðir hamborgarar

Með helgarkaffinu: Texas sheet cake

Ofnbökuð svínalund með sinnepssveppasósu

ágúst 27, 2015október 1, 2020 ~ Svava ~ 1 athugasemd

Við ákváðum að draga aftur í gang það stórskemmtilega verkefni að láta krakkana skiptast á að sjá um þriðjudagsmatinn. Mér þykir svo gaman að sjá hvað þau velja að hafa í matinn en því verður ekki neitað að metnaðurinn er mismikill hjá þeim. Á meðan sumir eru að gæla við að elda jólaskinku eru aðrir að velta því fyrir sér að sjóða fisk. Eitt er þó víst að þau hafa mjög gott og gaman af þessu. Jakob reið fyrstur á vaðið og bauð upp á kjöt í káli, með soðnum nýjum kartöflum, gulrótum og bræddu smjöri. Þvílík veisla! Við borðuðum á okkur gat.

Það kemur þó engin uppskrift frá veislumatnum hans Jakobs hingað á bloggið (enda svo sem enga uppskrift sem þarf við að sjóða kjöt í káli, það er bara öllu húrrað í pott og soðið!) heldur langaði mig að setja inn uppskrift af sunnudagsmatnum okkar, heilsteiktri svínalund með sinnepssveppasósu sem okkur þótt svo æðislega gott. Kannski hugmynd fyrir helgina?

Ofnbökuð svínalund með sinnepssvepasósu

600 g svínalund
salt og pipar
smjör
150 g sveppir
1 skarlottulaukur
1 msk hveiti
1 dl kjötkraftur af steikarpönnunni
1 dl rjómi
1 dl mjólk
1 msk kálfakraftur (fæst fljótandi í glerflöskum, stendur kalvfond á)
1 msk dijon sinnep
skvetta af sojasósu
smá sykur

Hreinsið kjötið og kryddið með salti og pipar. Bræðið smjör á pönnu og brúnið hliðarnar á kjötinu. Takið kjötið af pönnunni og setjið í eldfast mót. Hellið 1 dl af vatni á pönnuna og sjóðið kraftinn upp (hann verður notaður í sósuna). Setjið kjötið í 175° heitan ofn í um 20 mínútur, eða þar til kjötmælir sýnir 67°. Látið kjötið standa í 10 mínútur áður en það er skorið.

Skerið sveppina í fernt og hakkið laukinn. Bræðið smjör í potti við miðlungsháan hita og steikið laukinn og sveppina þar til laukurinn er mjúkur. Stráið hveiti yfir og hrærið vel. Hrærið steikarkraftinum saman við og síðan rjóma, mjólk og kálfakrafti. Látið sjóða saman í 5 mínútur. Smakkið til með sykri, dijon sinnepi, salti, pipar og smá sojasósu.

Vikumatseðill

ágúst 23, 2015október 1, 2020 ~ Svava ~ Skrifa athugasemd

Á morgun er sumarfríinu lokið hjá öllum fjölskyldumeðlimum og ég held að það syrgi það enginn. Við erum búin að eiga svo yndislegt sumar að enginn getur kvartað. Við ætlum að njóta dagsins í dag og byrjum hann í bröns hjá vinafólki. Ég er með fræhrökkbrauð í ofninum og ætla að gera feta- og sítrónumauk og taka með mér. Á morgun fer síðan allt á fullt, foreldraviðtal um morguninn, vinna hjá mér, skóli hjá krökkunum, og strákarnir að keppa í fótboltanum seinni partinn. Líf og fjör, alveg eins og það á að vera!

Vikumatseðill

Mánudagur: Gratineraður fiskur á hrísgrjónabeði

Þriðjudagur: Milljón dollara spaghetti

Miðvikudagur: Ofnbakaður grjónagrautur

Fimmtudagur: Pylsupottréttur með beikoni og sweet chili rjómasósu

Föstudagur: Grísk pizza

Með helgarkaffinu: Heimsins bestu súkkulaðibitakökur

Ofnbakaðir maískólfar

ágúst 22, 2015október 1, 2020 ~ Svava ~ Skrifa athugasemd

Ég dáist að þeim sem eru að hlaupa í maraþoninu í dag. Sjálf sit ég enn heima í náttsloppnum og get svarið það að ekkert hefði getað rifið mig út í morgun til að hlaupa. Ég fæ meira að segja hroll við tilhugsunina. Mér þykir svo brjálæðislega notalegt að byrja dagana rólega um helgar, að gera mér eggjahræru og fletta blaðinu yfir morgunmatnum.

Ég veit ekki hvort það sé mikið grillveður í kortunum þessa helgina en ég ofnbakaði maískólfa um daginn sem vöktu gífurlega lukku hér heima. Það má vel bera þá fram með öðru en grillmat, til dæmis með heilsteiktum kjúklingi. Hvernig væri til dæmis að gera hlutina einfalda og kaupa grillaðan kjúkling, heita kjúklingasósu og hrásalat í búðinni og skella síðan maískólfum og frönskum í ofninn þegar heim er komið. Það mun enginn kvarta undan slíkri veislu!

Ofnbakaðir maískólfar

maískólfar
salt og pipar
smjör

Hitið ofninn í 200°. Saltið og piprið maískólfana vel (verið ekkert að spara það!). Klæðið lítið eldfast mót með bökunarpappír og leggið maískólfana í. Setjið vel af smjöri ofan á hvern og einn maískólf og bakið í 35-45 mínútur, eða þar til þeir byrja að brúnast. Snúið maískólfunum annað slagið á meðan þeir eru í ofninum. Þegar þeir koma úr ofninum er smá smjör sett yfir þá áður en þeir eru bornir fram.

Vikumatseðill

ágúst 16, 2015október 1, 2020 ~ Svava ~ Skrifa athugasemd

Nú er síðasta vikan í sumarfríinu hjá krökkunum að renna upp og eftir hana hefst skólinn að nýju. Við höfum átt æðislegt sumar og náð að ferðast mikið um landið, meðal annars í tvær ferðir norður á Akureyri, heimsótt Húsavík og Ásbyrgi, keyrt hringinn í kringum landið, eytt viku á Austfjörðum, dvalið í sveitinni góðu og enduðum sumarfríið á Þjóðhátíð í Eyjum. Eftir sitja skemmtilegar minningar og hellingur af myndum frá góðum dögum.

Á meðan við keyrðum austur á firði voru strákarnir okkar að keppa síðustu leikina sína í Rey Cup. Þeir komu til okkar með flugi daginn eftir, beint af fótboltavellinum, og grétu það ekki að sleppa við aksturinn.

Veðurspáin lofaði ekki góðu áður en við lögðum af stað en sem betur fer rættist ekki úr henni. Veðrið lék við okkur mest allt fríið og við nutum til hins ítrasta.

Þessi smágerði árabátur reyndist óþreytandi afþreying. Hér mátti varla tæpara standa, en drengurinn náði bátnum og komst óhultur (og þurr!) um borð.

Ég hef oft minnst á Ernu vinkonu mína hér á blogginu en minnist þess ekki að hafa birt mynd af henni áður. Við höfum verið vinkonur í 34 ár, ólumst upp í parhúsi og höfum búið á móti hvor annarri síðastliðin 9 ár. Það munar ári á dætrum okkar og strákarnir okkar eru jafn gamlir og bekkjabræður. Við tölum saman á hverjum degi og það væri lítið varið í lífið án hennar. Myndin af okkur stöllunum er tekin á Seiðisfirði í sumar.

Við buðum Ernu og fjölskyldu í mat í bústaðinn til okkar og hér stend ég í undirbúningi. Við grilluðum þennan BBQ kjúkling og í eftirrétt vorum við með súkkulaðiköku og ís.

Síðar um kvöldið kveiktum við bál og grilluðum sykurpúða. Krakkarnir voru búnir að safna spreki fyrr um daginn og áttu allan heiðurinn af bálinu.

Var ég búin að segja að veðrið var yndislegt? Lúxussumar sem við fengum!

Það má ekki líta af þessum drengjum. Ég var ósköp fegin að fá þá óhulta niður aftur. Skömmu síðar stukku þeir ofan í Eyvindará (sem er undir þeim á myndinni) og Gunnar gerði sér lítið fyrir og synti yfir hana, eins ísköld og straumgóð áin er.

Jökulsárlón á sumarkvöldi. Fallegra en allt.

Fótboltavöllurinn á Neskaupsstað hlýtur að vera með þeim fallegri á landinu. Það er ekki hægt að sleppa því að taka leik þar.

Hengirúm á höfninni á Eskifirði. Meganæs!

Besta kaup sumarsins var klárlega tengdamömmuboxið góða. Við erum ekki nógu klár í að ferðast með lítinn farangur og 10 daga ferðalag með 4 börn hefði verið hrikalegt án þess! Boxið gleypti allan farangurinn og gerði það að verkum að það fór vel um alla í bílnum.

Það var ýmislegt brallað og hér voru útbúnir frostpinnar fylltir með hlaupböngsum. Hlaupbangsar eru settir í frostpinnaform, fyllt ýmist með sprite eða eplasíder og fryst. Herlegheitin runnu vel ofan í krakkana.

Sumarfríið endaði síðan á Þjóðhátíð sem gaf minningar fyrir lífstíð.

Núna er ég búin í sumarfríi í bili og hversdagsleikinn tekinn við, sem inniheldur meðal annars vikumatseðlana góðu. Ég var farin að sakna þeirra! Hér kemur sá fyrsti í haust.

Vikumatseðill

Mánudagur: Fiskur í okkar sósu

Þriðjudagur: Gúllas með sólþurrkuðum tómötum

Miðvikudagur: Lauksúpa með beikonkurli og steiktu hvítlauksbrauði

Fimmtudagur: Spaghetti með ofnbökuðu beikoni í hvítlauksolíu

Föstudagur: Kasjúhnetukjúklingur

Með helgarkaffinu: Mjúk kanilsnúðakaka

Pannacotta með hvítu súkkulaði og ástaraldin

ágúst 13, 2015október 1, 2020 ~ Svava ~ 3 athugasemd

Mér fannst haustið koma í gær og verð að viðurkenna að mér þótti það ósköp notalegt. Hvort það sé komið til að vera á síðan eftir að koma í ljós en það er eitthvað við haustið sem mér þykir sjarmerandi. Skólarnir byrja að nýju og allt fellur aftur í rútínuna sem á svo vel við mig. Að við síðan ákváðum að framlengja sumrinu með Spánarferð í september gerir tilhugsunina um haustið enn ljúfari.

Ég var að velta fyrir mér hvað ég eigi að hafa í matinn um helgina og þá rifjaðist upp fyrir mér uppskrift að himneskum eftirrétti sem hefur enn ekki farið hingað inn á bloggið. Þetta er með betri eftirréttum sem ég hef smakkað! Ástaraldin og hvítt súkkulaði er hin fullkomna blanda. Ég á enn eftir að ákveða helgarmatseðilinn en þessi eftirréttur fer klárlega á hann.

Pannacotta með hvítu súkkulaði og ástaraldin (uppskrift fyrir 2)

2½ dl rjómi
1 msk vanillusykur
½ msk hunang
40 g hvítt súkkulaði
1 matarlímsblað
2 ástaraldin

Látið matarlímið liggja í köldu vatni í amk 5 mínútur. Setjið rjóma, vanillusykur, hunang og hvítt súkkulaði í pott og hitið við vægan hitta þar till suðan er næstum komin upp. Takið pottinn þá af hitanum, takið matarlímsblaðið úr vatninu (kreistið mesta vatnið frá) og hrærið því út í pottinn. Hellið pannacottanu í tvær skálar og látið standa í ísskáp í amk 3 klst. Setjið ástaraldin yfir rétt áður en pannacottað er borið fram.