Pulled chicken

janúar 23, 2014október 1, 2020 ~ Svava ~ 2 athugasemd

Þegar ég kom heim úr vinnunni í dag var Malín búin að baka bollakökur með súkkulaðikremi. Þær voru svo mjúkar og góðar að ég hefði getað borðað þær allar. Ég elska að koma heim þegar krakkarnir hafa bakað og finnst það vera dásamlegur hversdagslúxus að fá kökubita eftir vinnudaginn.

„Pulled pork“ eða rifið svínakjöt hefur verið vinsæll réttur undanfarin ár (þú getur séð uppskriftina sem ég nota hér). Kjötið setjum við ýmist í hamborgarabrauð, tortillavefjur eða tacoskeljar ásamt grænmeti og oftast smá sýrðum rjóma. Það má svo bera herlegheitin fram með góðu salati, kartöfubátum (þessir eru í algjöru uppáhaldi), nachos eða hverju sem er.

Ég prófaði um daginn að skipta svínakjötinu út fyrir kjúkling og var mjög ánægð með útkomuna. Eldunartíminn var mun styttri og eldamennskan gerist varla einfaldari. Við settum kjúklinginn í tortillakökur ásamt káli, rauðri papriku, tómötum, avokadó, kóriander og sýrðum rjóma. Brjálæðislega gott!

Rifinn kjúklingur

900 g kjúklingabringur
2½ – 3 dl barbeque sósa
1 laukur, skorin í þunna báta
paprikuduft
olía

Hitið ofninn í 130-140°. Steikið kjúklingabringurnar á pönnu þar til þær eru komnar með smá steikingarhúð. Kryddið með paprikudufti og leggið yfir í eldfast mót eða ofnpott. Sáldrið smá olíu yfir kjúklinginn og setjið laukbátana og barbequesósuna yfir. Setjið lok á ofpottinn eða álpappír yfir eldfasta mótið (þó ekki nauðsynlegt). Eldið í miðjum ofni í um 2½ klst, eða þar til kjúklingurinn er eldaður í gegn. Kjúklingurinn á að detta hæglega í sundur þegar gaffli er stungið í hann. Tætið kjúklinginn í sundur (t.d. með tveimur göfflum) og berið fram.

Browniekaka með daim og jarðaberjafrauði

janúar 21, 2014október 1, 2020 ~ Svava ~ 7 athugasemd

Eftir kvöldmatinn í gær létum við okkur dreyma um góðan eftirrétt. Eftir að hafa velt upp öllum mögulegum eftirréttum sem okkur komu til hugar komst ég að þeirri niðurstöðu að mig langaði mest í þessa köku, brownieköku með daim og jarðaberjafrauði. Ég hefði gefið mikið fyrir sneið af henni, þó ekki væri nema smá flís til að njóta eftir matinn. Hún er svo æðislega góð, með ríkulegum súkkulaðibotni og fersku jarðaberjafrauði sem fer saman eins og hönd í hanska.

Það er óhætt að segja að kakan hafi farið sigurför um sænska matarbloggheima og ég hef ekki tölu á þeim bloggsíðum sem ég hef séð uppskriftina á. Mér þykir það alltaf góðs viti að sjá sömu uppskrift á mörgum stöðum og þær uppskriftir hafi undantekningarlaust reynst mér góðar.

Ég verð að viðurkenna að matarlím fældi mig lengi vel frá uppskriftum en ég er sem betur fer komin yfir það. Ég gerðist meira að segja svo djörf að bæta auka matarlímsblaði í þessa köku þar sem ég las í umsögnum að hún ætti það til að vera ekki nógu stíf. Upphaflega uppskriftin gerði ráð fyrir 5 matarlímsblöðum en ég nota 6 blöð og hef aldrei lent í vandræðum.

Browniekaka með daim og jarðaberjafrauði

Brownie botn:

110 g smjör
2 1/3 dl sykur
1 msk sýróp
2 egg
1 1/2 dl hveiti
1/2 tsk salt
1 1/2 tsk vanillusykur
1 dl kakó
2 stk. stór Daim (56 g hvor pakkning), grófhakkað

Jarðaberjafrauð:

5-6 matarlímsblöð
1/2 kg jarðaber
3 eggjarauður
2 dl flórsykur
6 dl rjómi

Skraut

1 kg jarðaber

Brownie botn: Hitið ofninn í 175°. Hrærið smjör, sykur og sýróp saman þar til blandan verður ljós og létt. Hrærið eggjunum saman við. Bætið hveiti, salti, vanillusykri, kakói og grófhökkuðu Daim út í og hrærið saman. Setjið deigið í smurt smelluform sem er 24 cm í þvermál og bakið í 20 mínútur. Látið botninn kólna alveg áður en jarðaberjafrauðið er gert.

Það getur verið gott að losa um kökuna í forminu áður en jarðaberjafrauðið er sett yfir hana, til að það sé einfaldara að flytja kökuna yfir á kökudisk þegar hún er tilbúin.

Jarðaberjafrauð: Leggið matarlímsblöð í kalt vatn í 5 mínútur. Maukið jarðaber í matvinnsluvél eða með töfrasprota og leggið til hliðar. Hrærið eggjarauður og flórsykur saman þar til blandan verður ljós og létt. Léttþeytið rjómann í annarri skál. Hitið 1/10 af jarðaberjamaukinu í potti. Takið matarlímsblöðin úr vatninu, kreystið mesta vökvann frá þeim og bætið blöðunum í pottinn. Látið þau bráðna við vægan hita í jarðaberjamaukinu. Þegar matarlímsblöðin hafa bráðnað er blöndunni hrært saman við restina af jarðaberjamaukinu.

Blandið eggjablöndunni varlega saman við jarðaberjamaukið og hrærið síðan rjómanum varlega saman við þar til blandan er slétt. Hellið blöndunni yfir brownie botninn. Látið kökuna standa í að minnsta kosti 4 tíma í ísskáp áður en hún er borin fram. Það má einnig frysta kökuna og þá er hún tekin út og látin standa við stofuhita 4 tímum áður en hún er borin fram.

Setjið jarðaber yfir kökuna áður en hún er borin fram.

Vikumatseðill

janúar 19, 2014október 1, 2020 ~ Svava ~ 1 athugasemd

Ég verð að viðurkenna að þó að snjórinn hafi sína kosti þá gleðst ég yfir því að rýrnun hans þessa dagana. Við áttum skemmtilega daga í brekkunni í vetur en í dag fögnum við því að geta farið með strákana niður á Klambratún með nýju Penny-hjólabrettin sem þeir fengu í jólagjöf. Ég vona að það verði hægt að renna sér þar á klakalausum og nokkuð sandlitlum stígum.

Vikumatseðillinn er hér á sínum stað. Ég veit að pylsugratínið á fimmtudeginum er tilhlökkunarefni hjá fjölskyldunni minni en mér þykir föstudagurinn standa upp úr þessa vikuna, enda sjálfur bóndadagurinn þá.

Mánudagur: Bresk fiskbaka að hætti Gordon Ramsey er æðislegur réttur og þó það taki svolítinn tíma að útbúa hana þá finnst mér tímanum klárlega vel varið.

Þriðjudagur: Ljúffengur pestó og fetafylltur kjöthleifur er réttur sem ég fæ ekki nóg af.

Miðvikudagur: Basiliku og parmesan tómatsúpa passar vel í miðri viku og mér þykir kjörið að bera hana fram með uppáhalds brauðinu mínu, New York Times brauði.

Fimmtudagur: Pylsugratín með kartöflumús er réttur sem vekur alltaf lukku hjá fjölskyldunni.

Föstudagur: Bóndadagur! Ég elska daga sem þessa. Í ár hef ég hug á að elda kasjúhnetukjúkling og bjóða síðan upp á klessukökumöffins í eftirrétt.

Með helgarkaffinu: Skúffukaka og ískalt mjólkurglas svíkur seint. Þessi uppskrift er ein af uppáhalds!

Pestóbaka með bökuðu grænmeti

janúar 15, 2014október 1, 2020 ~ Svava ~ 6 athugasemd

Ég dáist að fólki sem byrjar árið á heilsuátaki. Ég skil ekki hvernig það er hægt í þessum leiðinlegasta mánuði ársins. Hjá mér snýst janúar oftast um að dekra meira við mig, að láta meira eftir mér og njóta meira. Að gera mánuðinn eins góðan og ég mögulega get. Ég borðaði súkkulaði eftir morgunmatinn alla síðustu viku og fannst það dásamleg byrjun á deginum. Síðan gerði ég pestóböku í kvöldmatinn eitt kvöldið og fannst hún vera æðislegur endir á deginum.

Það er eins með þessa uppskrift og svo margar aðrar, hún hefur verið í fórum mínum í fleiri ár og ég furða mig á því hvað það tók mig langan tíma að koma því í verk að elda hana. Bakan er nefninlega æðislega góð. Ég held að uppskriftin komi upphaflega úr sænska matreiðslublaðinu Allt om mat, en ætla ekki að sverja fyrir það.

Mér þykir alltaf gaman að bera bökur fram því þær eru svo fallegar á borði, sérstaklega þegar þær eru bakaðar í bökuformum með lausum botni (þau fást víðast hvar fyrir lítinn pening).

Pestóbaka með bökuðu grænmeti

Skelin:

3 dl hveiti
125 g smjör, kalt úr ísskáp
2 msk kalt vatn

Blandið hveiti og smjöri saman í grófa mylsnu í matvinnsluvél, með gaffli eða með fingrunum. Bætið vatninu saman við og vinnið snögglega saman í deig. Þrýstið deiginu í botn á 24 cm bökumóti með lausum botni og stingið yfir bontinn með gaffli. Látið standa í ísskáp í 30 mínútur.

Fyllingin:

2 paprikur, gul og rauð
2 rauðlaukar
1 kúrbítur
1 msk ólívuolía
salt
svartur pipar
3 egg
2 dl mjólk
1 dl pestó

Hitið ofn í 250°. Skerið paprikur í bita, rauðlauk í þunna báta og kúrbít í sneiðar. Setjið á ofnplötu, dreypið ólívuolíu yfir og kryddið með salti og pipar. Bakið í miðjum ofni í 15-20 mínútur.

Hrærið saman eggjum, mjólk og pestó.

Þegar grænmetið hefur bakast er ofnhitinn lækkaður í 200°. Forbakið bökuskelina í miðjum ofni í um 10 mínútur. Setjið þá grænmetið í botninn og hellið eggjablöndunni yfir. Bakið í miðjum ofni í 35-40 mínútur.

Berið bökuna fram með góðu salati og jafvel salami, hráskinku og ólívum.

Vikumatseðill

janúar 12, 2014október 1, 2020 ~ Svava ~ 2 athugasemd

Í gær áttum við Malin mæðgnadag, nokkuð sem við höfum verið duglegar með upp á síðkastið. Mér þykir tíminn líða svo hratt, finnst svo stutt síðan hún var lítil og skrýtið að hugsa til þess að í haust byrji hún í menntaskóla. Ég nýt þess svo að eiga þessar stundir með henni, bara við tvær. Í gær röltum við Laugarveginn, kíktum í búðir og enduðum á Laundromat þar sem við fengum okkur að borða. Eftir það hittum við Ögga og strákana og fórum svo í afmælisveislu. Þaðan fórum við til mömmu í pizzuveislu/kveðjupartý fyrir systur mína sem flaug heim til Köben í dag. Ég er strax farin að sakna hennar.

Ég fékk ábendingu frá lesenda um að setja vikumatseðlana undir uppskriftaflipann til að gamlir vikumatseðlar verði aðgengilegri. Mér þykir þetta góð ábending og lofa að þetta stendur til bóta hjá mér. Þar til ég kem mér í að laga þetta þá bendi ég á að það má finna alla vikumatseðlana með því að velja vikumatseðlar undir efnisflokkaleitinni hér til hliðar.

Matseðill vikunnar er einfaldur og góður. Tælenska kjúklingaenchiladas á föstudeginum er ó svo gott og tilhlökkunarefni fyrir vikuna.

Mánudagur: Mér þykir ofnbakaður fiskur í paprikusósu æðislega góður og hef ekkert á móti því að byrja vikuna á honum.

Þriðjudagur: Einfalt og stórgott lasagna borið fram með salati og jafnvel hvítlauksbrauði. Drjúgt og alltaf afgangur til að taka með í nesti daginn eftir eða að nýta í kvöldmat daginn eftir.

Miðvikudagur: Þar sem það er eflaust til afgangur af lasagnanu (nema það hafi verið tekið í nesti) þá þykri mér sniðugt að gera grjónagraut í dag fyrir krakkana og njóta afganganna sjálf. Þau taka grautnum alltaf fagnandi en ég er minna hrifin af honum. Ódýrt, einfalt og góð nýting á hráefnum þar sem afgangurinn af lasagnanu mun klárast.

Fimmtudagur: Spaghetti með ofnbökuðu beikoni í hvítlauksolíu er enn ein dásemdin úr smiðju Nigellu. Einfaldur og stórgóður réttur.

Föstudagur: Tælenskt kjúklingaenchiladas má gjarnan vera á disknum mínum alla föstudaga. Stórkostlega góður réttur!

Með helgarkaffinu: Mér þykir eplakaka með marsípani fara vel með helgarkaffinu.

Sæt kartöflustappa með pekanhnetukrönsi og heimalagað rauðkál

janúar 9, 2014október 1, 2020 ~ Svava ~ 2 athugasemd

Það átti ekki að líða heil vika á milli bloggfærsla en mér til varnar þá hefur vikan liðið óvenju hratt. Það gæti haft eitthvað með það að gera að systir mín er stödd á landinu með dóttur sína og ég vil hitta þær eins oft og ég get. Síðan tók ég upp á því að fara með vinnufélögum mínum í stutta fjallgöngu í gærkvöldi og þegar ég kom heim langaði mig mikið frekar að leggjast í sófann með Ögga en að setjast við tölvuna. Í kvöld eigum við von á mömmu, systur minni og bróður í mat en áður en þau koma langaði mig til að nýta tímann og skrifa ykkur nokkrar línur.

Ég sá að það eru komin komment sem ég á eftir að svara. Það var meðal annars óskað eftir uppskriftunum að sætu kartöflustöppunni með pekanhnetukrönsinu og heimagerða rauðkálinu. Ég læt uppskriftirnar fylgja með mikilli gleði enda sérlega gaman að geta orðið við því sem þið óskið eftir. Ég er ekki hrifin af illa lyktandi rauðkáli með alls konar gummsi í en mér þykir þetta rauðkál æðislega gott og það kemur dásamlegur ilmur um húsið þegar það sýður. Ég fékk uppskriftina hjá Ernu vinkonu minni og þarf alltaf að hringja í hana úr búðinni til að spyrja hvaða saft sé í uppskriftinni. Hún man það betur en ég og svarar mér alltaf að það verði að vera rifsberjasaft en það fæst ekki alls staðar. Við höfum þó alltaf gengið að því vísu í Hagkaup.

Sæta kartöflustappan er ómissandi með kalkúninum og þessi uppskrift er svakaleg. Ég man ekki hvaðan hún kemur en hún hefur verið fastur liður á áramótaborðinu okkar til fjölda ára og því verður seint breytt.

Heimalagað rauðkál

1/2 rauðkálshaus, skorinn þunnt niður
um 70 g smjör
um 350 g rifsberjasaft

Bræðið smjörið í motti. Hitið rauðkálið í smjörinu við vægan hita í nokkrar mínútur. Hellið saftinu yfir þannig að það fljóti aðeins yfir rauðkálið. Látið sjóða í 10 mínútur. Sigtið vökvann frá áður en rauðkálið er borið fram. Ef það á ekki að bera rauðkálið strax fram þá er það látið liggja í pottinum og svo hitað aftur áður en það er borið fram.

Sæt kartöflustappa með pekanhnetukrönsi

3 sætar kartöflur (í stærri kantinum)
100 g hrásykur
2 egg
75 g mjúkt smjör
1 dl mjólk
1/2 – 1 tsk vanilludropar

Pekanhnetukurl

200 g púðursykur
100 g saxaðar pekanhnetur
40 g hveiti
75 g brætt smjör

Forhitið ofninn í 175°og smyrjið eldfast mót.

Sjóðið sætu kartöflurnar þar til þær eru soðnar í gegn og fjarlægið þá hýðið. Skerið kartöflurnar í bita og setjið í skál ásamt sykri, eggjum, smjöri, mjólk og vanilludropum. Stappið vel saman og færið yfir í eldfast mót.

Blandið saman púðursykri, pekanhnetum og hveiti. Bræðið smjörið í annari skál og hellið saman við hnetublönduna. Hrærið saman með skeið og dreifið yfir kartöflustöppuna. Bakið í 30 mínútur.

Nýársdagur og einfaldar snittur með bruschettina

janúar 1, 2014október 1, 2020 ~ Svava ~ 4 athugasemd

Gleðilegt nýtt ár kæru lesendur. Hvernig leggst nýja árið í ykkur? Við fögnuðum áramótunum hér heima með bróður mínum og tengdaforeldrum og áttum yndislegt kvöld.

Öggi og Gunnar hófu gærdaginn á því að hlaupa gamlárshlaupið og ég hljóp út á náttsloppnum til að taka mynd af Gunnari áður en þeir fóru af stað. Mér finnst hann svo duglegur að það nær engri átt!

Ég eyddi deginum hér heima í rólegheitunum, eldaði mat og útbjó eftirrétti.

Matseðillinn fyrir gamlárskvöld var kalkúnaskip

borið fram með sykurhúðuðum kartöflum

heimalöguðu rauðkáli

sætri kartöflustöppu með pekanhnetukrönsi

smjörsoðnu maískorni með sjávarsalti

kalkúnafyllingu

eplasalati

og svo auðvitað sósu og rifsberjahlaupi. Við borðuðum yfir okkur! Í eftirrétt var ég með tíramísú, súkkulaðimús og bismarkböku. Eftir miðnætti, þegar við komum inn eftir að hafa skotið upp flugeldum, buðum við upp á kampavín, osta, vínber, sörur, rocky road og snakk. Þegar við vöknuðum í morgun vorum við ennþá södd.

Í dag hef ég að mestu eytt deginum undir teppi í stofusófanum með bók og helsta framlag mitt til dagsins var að skera niður snittubrauð, setja tilbúna bruschettina úr krukku yfir og hita í 200° heitum ofni í 10 mínútur. Þegar brauðið kom úr ofninum reif ég ferskan parmesan yfir og allir nutu vel með ísköldu gosi sem gleymdist úti á palli í nótt. Næstum of einfalt og æðislega gott.

Vinsælustu uppskriftirnar á árinu 2013

desember 31, 2013október 1, 2020 ~ Svava ~ 8 athugasemd

Þá er síðasti dagur ársins runninn upp. Við verðum með okkar árlegu kalkúnaveislu í kvöld og ég ætla að eyða deginum í eldhúsinu. Mér þykir það góð og afslappandi tilhugsun. Hálfgert dekur að geta eytt heilum degi við það sem mér þykir skemmtilegt. Það er alltaf ákveðin stemmning sem að fylgir þessum degi, tilhlökkun fyrir kvöldinu og nýju upphafi.

Þegar ég lít yfir liðið ár fyllist ég gleði yfir því hvað bloggið mitt hefur vaxið og dafnað vel á árinu. Heimsóknum hefur fjölgað jafnt og þétt og hafa farið hátt í 23.000 á annasömustu dögunum. Mér þykir óraunverulegt að það séu svona margir sem kíkja hingað inn og fæ fiðrildi í magann við tilhugsunina. Ég vil þakka ykkur fyrir samfylgdina, öll kommentin og alla tölvupóstana sem ég hef fengið frá ykkur á árinu. Þið hafið fegrað árið með fallegum orðum og ég mun seint ná að lýsa því hversu vænt mér þykir um þau. Frá dýpstu hjartarótum þakka ég fyrir mig.

Þessi síðasta bloggfærsla ársins er færsla númer 300 sem ég birti hér á blogginu og mér þykir við hæfi að enda hana með upprifjun á vinsælustu uppskriftunum á árinum sem leið. Ég óska þess að nýja árið færi ykkur gleði, gæfu og góðar stundir.

Mér þykir hálf kómískt að vinsælasta uppskrift ársins sé kjúklingur með sætum kartöflum, spínati og fetaosti þar sem ég var óörugg með að setja hann á bloggið því mér þóttu myndirnar svo ómöglegar. Það virtist þó ekki koma að sök því uppskriftinni hefur verið deilt yfir 5 þúsund sinnum og á toppsætið yfir vinsælustu uppskriftir ársins.

Í öðru sæti er einföld og góð skúffukaka. Ég vil ekki vita hversu oft ég hef bakað þessa köku, enda ekki hægt að fá nóg af skúffuköku og ísköldu mjólkurglasi. Namm! Hér er önnur góð skúffukökuuppskrift sem ég baka líka oft, en komst þó ekki á listann.

Í þriðja sæti er mexíkósk kjúklingasúpa. Ég fæ ekki leið á þessari súpu og gleðst yfir því að sjá þennan trygga vin svona ofarlega á listanum.

Rice krispies kaka með bananarjóma og karamellu prýðir fjórða sæti vinsældarlistans. Mér þykir hún eiga sætið fyllilega skilið, enda stórgóð kaka sem allir falla fyrir.

Hakkabuff með fetaosti er fimmta vinsælasta uppskrift ársins. Mér þykir þetta vera hversdagsréttur eins og þeir gerast bestir.

Uppáhalds bananabrauðið okkar nældi sér í sjötta sæti listans. Æðislegt brauð sem hverfur alltaf á svipstundu af borðinu.

Í fyrra var milljón dollara spaghetti vinsælasta uppskrift ársins en í ár er hún í sjöunda sæti. Fjölskylduvænn réttur sem svíkur seint.

Í áttunda sæti er ein af mínum uppáhalds bökum, nefnilega mexíkósk kjúklingabaka.

Mjúk amerísk súkkulaðikaka er níunda vinsælasta uppskrift ársins. Kakan er draumi líkast, lungamjúk og bragðgóð. Ég bakaði hana síðast fyrir viku, við miklar vinsældir heimilismanna.

Að lokum, tíunda vinsælasta uppskrift ársins 2013 er fylltar tortillaskálar. Æðislegur réttur sem gaman er að bera fram.

Tillögur af eftirréttum fyrir gamlárskvöld

desember 29, 2013október 1, 2020 ~ Svava ~ 2 athugasemd

Eru þið búin að kíkja á útsölurnar? Ég ætla að halda mér frá þeim en gerði þó eina undantekningu og keypti mér þriggja hæða fatið sem þið sjáið hér fyrir ofan í Ilvu fyrir 1500 krónur. Mér þótti það svo fallegt og kjörið til að bera fram sætindin í um áramótin.

Ég ætla að gera hlé á vikumatseðlinum þessa vikuna þar sem áramótin einkenna hana með viðeigandi frídögum. Ég er alltaf með heilsteiktan kalkún á gamlárskvöld en í ár ætla ég að bregða út af vananum og prófa smjörsprautuðu kalkúnabringurnar frá Hagkaup. Ég hef heyrt vel af þeim látið og hlakka til að prófa. Við verðum líka með kalkúnabringur í salvíusmjöri sem Öggi fékk í jólagjöf frá vinnunni sinni. Hvað eftirréttinn varðar þá hallast ég að því að gera tíramísú úr nýju bókinni hennar Rikku, Veisluréttir Hagkaups, sem ég fékk í afmælisgjöf. Ég hef undanfarin jól gert tíramísú eftir gamalli uppskrift frá Rikku en þar sem ég get ómögulega fundið hana þá ætla ég að prófa nýju uppskriftina (þú finnur hana hér). Kannski er þetta sama uppskriftin en ég man þó að sú gamla var með núggatsúkkulaði.

Ef þið eruð líka í eftirréttahugleiðingum fyrir komandi veisluhöld þá er ég með nokkrar tillögur sem ég mæli með:

1. Ísbaka með bourbon karamellu. Brjálæðislega góð baka úr smiðju Nigellu Lawson sem ég er að gæla við að bæta á eftirréttaborðið hjá mér um áramótin.

2. Frosin bismarkbaka með marshmellowkremi. Ég á hálfa böku í frystinum síðan um daginn sem ég hef bannað fjölskyldumeðlumum að snerta því ég ætla að draga hana fram um áramótin, þó að það sé búið að borða helminginn af henni! Ég þarf bara aðeins að fegra bökuna með jólastafabrjóstsykri eða bismarkbrjóstsykri og þá mun hún sóma sér vel á eftirréttaborðinu.

3. Oreo-ostakaka þykir mér fara vel á eftirréttaborðinu og get lofað að hún mun falla í kramið hjá öllum aldursflokkum.

4. Súkkulaðipavlova með mascarponerjómakremi, Maltesers, Daim, ristuðum pekanhnetum og súkkulaðisósu er algjör bomba og fullkomin áramótaterta. Það væri smart að stinga stjörnuljósum í hana rétt áður en hún er borin fram.

5. Einföld súkkulaðimús með karamelluhúðuðum hnetumulningi er einfaldur eftirréttur sem krakkarnir mínir elska. Mér þykir hnetumulningurinn ómissandi með.

Kjúklingakúskús með sweet chili

desember 28, 2013október 1, 2020 ~ Svava ~ 5 athugasemd

Í gærmorgun hélt Öggi til vinnu eftir jólafrí en ég nýt góðs af því að vera í fríi til 2. janúar. Mér þykir það æðislegur lúxus að geta verið hér heima á náttfötunum fram eftir degi með krökkunum í jólafríinu þeirra. Í gær var heldur engin venjulegur dagur því strákarnir áttu afmæli. Við héldum afmælisveislu um síðustu helgi og í gær fórum við út að borða og síðan biðu afmælisgjafir og gleði hér heima eftir það.

Við erum búin að eiga yndisleg jól. Höfum borðað mikið, sofið mikið, lesið jólabækurnar, farið út á sleða og í gönguferðir á milli þess sem við klæddum okkur upp og fórum í jólaboð. Núna tek ég árs fríi frá jólamat fagnandi, enda búin að borða yfir mig og vel það af jólamat undanfarna daga. Í kvöld verður kjúklingur hér á borðum og uppskriftin er ekki af verri endanum. Hún kemur úr bók sem ég pantaði mér á netinu fyrir ári síðan og hefur verið mikið notuð síðan þá. Ég mæli svo sannarlega með réttinum enda bæði einfaldur og æðislega góður.

Kjúklingakúskús með sweet chili (uppsrift úr Arla kökets bästa)

500 g kjúklingafilé
4 dl vatn
1 teningur kjúklingakraftur
4 dl kúskús
1-2 púrrulaukar
2 hvítlauksrif
smjör
2 dl appelsínudjús
3/4 dl sweet chilisósa
1 teningur kjúklingakraftur
1 tsk japönsk sojasósa
2 dl jógúrt án bragðefna
salt

Hitið vatn og kjúklingakraft að suðu og hrærið kúskús saman við. Takið potinn af hitanum, setjið lokið á og látið standa í 6 mínútur.

Skerið kjúklinginn í bita og púrrulaukinn í strimla. Afhýðið og hakkið hvítlaukinn. Steikið kjúklinginn í smjöri á pönnu. Takið kjúklinginn af pönnunni þegar hann er steiktur. Setjið hvítlauk og púrrulauk á pönnuna og steikið þar til fer að mýkjast. Bætið appelsínudjús, sweet chilisósu, kjúklingateningi, sojasósu og kjúklingi á pönnuna. Látið sjóða í nokkrar mínútur. Takið pönnuna af hitanum og hrærið helmingnum af jógúrtinni saman við. Smakkið til með salti.

Hrærið kúskús upp með gaffli. Berið fram með kjúklingnum og því sem eftir var af jógúrtinni.