Vikumatseðill

febrúar 8, 2015október 1, 2020 ~ Svava ~ 1 athugasemd

Enn ein vikan að baki og tímabært að plana þá næstu. Mér líst vel á að hafa komandi viku einfalda og elda stóran skammt af chili con carne sem nýtist í tvær og jafnvel þrjár máltíðir. Þessi uppskrift er stórgóð og fer alltaf vel í mannskapinn hér heima. Kasjúhnetukjúklinginn er upplagt að hafa á föstudagskvöldi þar sem það tekur enga stund að reiða þann dásamlega rétt fram. Möndlukökunni fæ ég ekki leið á og mun hún fara stórvel með helgarkaffinu.

Eigið góða viku kæru lesendur ♥

Vikumatseðill

Mánudagur: Fiskréttur með blaðlauk og sveppum

Þriðjudagur: Chili con carne

Miðvikudagur: Afgangur af chili con carne, annað hvort settur í tortillur með gómsætu meðlæti eða á pizzu.

Fimmtudagur: Sveppasúpa og brauð

Föstudagur: Kasjúhnetukjúklingur

Með helgarkaffinu: Möndlukaka

Vikumatseðill

janúar 25, 2015október 1, 2020 ~ Svava ~ Skrifa athugasemd

Með yndislega helgi að baki þykir mér við hæfi að setjast niður og skipuleggja næstu viku. Að fara yfir hver á að vera hvar og hvenær. Hvaða kvöld er saumaklúbbur og hver er að fara í próf. Og það sem er ekki síður mikilvægt, að ákveða hvað eigi að vera í matinn í vikunni. Það léttir mér svo lífið að plana vikuna og gera stórinnkaup um helgar. Þá þarf ég ekki að fara í búðina eftir vinnu á virkum dögum heldur get brunað beint heim. Lúxus!

Vikumatseðill

Mánudagur: Þorskur í ljúffengri karrýsósu

Þriðjudagur: Parmesanbaka með spínati og kirsuberjatómötum

Miðvikudagur: Gulrótar- og tómatsúpa með kókosmjólk

Fimmtudagur: Asískar kjötbollur

Föstudagur: Kjúklingur með beikoni, steinselju og parmesan í dásamlegri sinnepssósu

Vikumatseðill

nóvember 16, 2014október 1, 2020 ~ Svava ~ 1 athugasemd

Ég gleðst á hverju ári þegar ég sé mandarínukassana birtast í verslunum. Bæði vegna þess að þær eru svo góðar og líka því þær minna á að það styttist í aðventuna. Ég held að þetta sé uppáhalds árstíminn minn og ég nýt mín sjaldan jafn vel og í desember. Jólatónlistin, baksturinn, undirbúningurinn…. stemningin í loftinu og fiðrildin í maganum. Ég verslaði fyrstu jólagjafirnar þegar ég gerði vikuinnkaupin í gær en nú er stór taxfree helgi í Hagkaup og því kjörið að nýta sér það til jólainnkaupa. Bæði til að nýta afsláttinn (hann er líka í netversluninni fyrir þá sem kjósa að versla heima í stofu) og líka því það er svo gott að vera í tíma með jólagjafainnkaupin og geta átt desembermánuð náðugan. Síðan er jú einfaldlega ekki hægt að kaupa Quality Street og Nóakonfekt of snemma! Ég vil geta notið þess allan desembermánuð að fá mér mola eftir matinn.

Vikumatseðill

Mánudagur: Ofnbakaður fiskur í paprikusósu

Þriðjudagur: Skinku- og spergilkálsbaka

Miðvikudagur: Blómkálssúpa

Fimmtudagur: Einfalt og stórgott lasagna

Föstudagur: Tælenskur kjúklingur í grænu karrý

Með helgarkaffinu: Dumle-lengjur

Vikumatseðill og jólavörur

nóvember 2, 2014október 1, 2020 ~ Svava ~ Skrifa athugasemd

Ég er svo glöð yfir því að nóvember sé runninn upp. Mánuðurinn sem fyrsta aðventan fellur á. Það sem ég hlakka til! Þegar ég gerði vikuinnkaupinn um síðustu helgi gaf ég mér góðan tíma í að skoða jólavörurnar sem voru komnar í Hagkaup. Það var tvennt sem fékk að fylgja með heim, annars vegar glerkúpullinn á myndinni fyrir ofan sem hreindýrin mín munu fá að liggja í yfir aðventuna og hins vegar nýr jólatrésfótur. Mig hefur lengi dreymt um hvítan jólatrésfót sem er í laginu eins og stjarna og hef upp á síðkastið leitað af slíkum á netinu. Var eiginlega búin að gefa upp alla von á að finna hann hér heima og komin á það að panta hann erlendis frá. Ég ætlaði því varla að trúa mínum eigin augum þegar ég sá hann í Hagkaup, alveg eins fót og ég hafði hugsað mér! Fóturinn er úr stáli, er þungur, massívur og alveg nákvæmlega eins og mig langaði í. Þvílík heppni!

Það er svolítið síðan ég setti vikumatseðil inn en þið vitið vonandi að ef þið skrifið vikumatseðill í leitina þá koma þeir allir upp. Nú þegar það er farið að dimma snemma og kólna í veðri þá langar mig alltaf meira í haustlegri mat. Súpur, kássur og kósýheit með fjölskyldunni og logandi kertaljós á matarborðinu. Það er einn af mörgum kostum vetrarins, hvað allt verður notalegt. Elska það.

Vikumatseðill

Mánudagur: Ítalskur lax með fetaostasósu

Þriðjudagur: Innbakað nautahakk

Miðvikudagur: Ofnbakaður grjónagrautur

Fimmtudagur: Kasjúhnetukjúklingur

Föstudagur: Tacopizzubaka

Með helgarkaffinu: Kúrbítsbrauð með valhnetum og súkkulaði

Vikumatseðill

ágúst 31, 2014október 1, 2020 ~ Svava ~ 4 athugasemd

Þar sem það er varla hundi út sigandi í þessu veðri þykir mér kjörið að taka daginn í að gera vikumatseðil og undirbúa vikuna. Vikuinnkaupin breytast alltaf aðeins hjá mér á haustin og sérstaklega núna þegar Malín tekur með sér nesti í skólann. Það er smá áskorun að finna hentugt nesti og við erum að prófa okkur áfram.

Á matseðlinum þessa vikuna veit ég að kjötbollurnar á þriðjudeginum og pylsugratínið á miðvikudeginum eru tilhlökkunarefni hjá krökkunum en hjá mér er það kjúklingasúpan á föstudeginum sem stendur upp úr. Hún er himnesk og ef þið hafið ekki prófað hana þá hvet ég ykkur til þess. Heimagerða Snickersið er síðan hápunktur vikunnar. Hamingjan hjálpi mér hvað það er gott. Það ætti að vera til á hverju heimili. Alltaf.

Mánudagur: Fiskréttur með blaðlauk og sveppum

Þriðjudagur: Ofnbakaðar kjötbollur

Miðvikudagur: Pylsugratín með kartöflumús

Fimmtudagur: Spaghetti carbonara

Föstudagur: Himnesk kjúklingasúpa með ferskjum

Helgardekrið: Heimagert Snickers

Vikumatseðill

júní 22, 2014október 1, 2020 ~ Svava ~ Skrifa athugasemd

Í gærkvöldi gerði ég uppáhalds granólað mitt og í leiðinni furðaði mig á því af hverju ég geri það ekki oftar. Þetta tekur enga stund! Það var því extra notalegt að koma fram í morgun, vitandi að það biði mín góður morgunverður án nokkurar fyrirhafnar. Besta byrjunin á deginum.

Matseðillinn fyrir komandi viku gefur hálfgert frí frá eldhúsinu á miðvikudeginum því þá er afgangur nýttur frá deginum áður. Uppskriftin er nefnilega stór og dugar vel í tvær máltíðir. Á föstudeginum er ein uppáhalds pizzan mín (ef þið hafið ekki gert hana þá hvet ég ykkur til að prófa!) og með helgarkaffinu kleinuhringir sem mig hefur langað í undanfarna daga. Ég fæ reglulega spurningar um kleinuhringjaformið sem ég nota og bendi því á að ég sá það um daginn í Hagkaup í Garðabæ (við endann á rekkanum með bökunarvörunum). Kostar ekki mikið og er hverrar krónu virði!

Mánudagur: Ofnbakaður fiskur í paprikusósu

Þriðjudagur: Chili con carne og New York Times-brauð

Miðvikudagur: Chili con carne með grænmeti í tortillavefju

Fimmtudagur: Rjómalöguð kjúklingasúpa

Föstudagur: Mexíkó pizza

Með helgarkaffinu: Kanilsykurhúðaðir kleinuhringir

Vikumatseðill

júní 15, 2014október 1, 2020 ~ Svava ~ Skrifa athugasemd

Þjóðhátíðardagurinn setur svip sinn á komandi viku og aftur er stutt vinnuvika framundan. Við förum alltaf á Rútstún á 17. júní og mér heyrist á krökkunum að það verði engin breyting þar á í ár. Þau vilja hvergi annars staðar vera á þessum degi, enda gaman að vera þar sem vinirnir eru. Nú er bara að vona að verðublíðan sem hefur verið upp á síðkastið haldist.

Ef þið eruð að velta kvöldverðum vikunnar fyrir ykkur þá kemur hér hugmynd að matseðli. Ef þið hafið ekki prófað ofnbökuðu kartöfluhelmingana þá mæli ég með að þið gerið það í snatri. Þeir eru guðdómlegir! Hamborgararnir eru sömuleiðis ómótstæðilegir og mér þykir þetta kombó fara vel á þjóðhátíðardeginum. Það er hægt að undirbúa matinn áður en hátíðarhöldin hefjast og þá tekur enga stund að koma matnum á borðið eftir að komið er heim.

Mánudagur: Steiktur fiskur í kókoskarrý

Þriðjudagur: Heimagerðir hamborgarar og ofnbakaðir kartöfluhelmingar

Miðvikudagur: Sveppasúpa

Fimmtudagur: Pasta með púrrulauk og beikoni

Föstudagur: Indverskur kormakjúklingur og nanbrauð

Með helgarkaffinu: Drömmekage

Vikumatseðill

maí 18, 2014október 1, 2020 ~ Svava ~ Skrifa athugasemd

Það er orðið langt síðan ég birti hér hugmynd að vikumatseðli. Þið vitið vonandi að ef ykkur vantar hugmyndir að kvöldmat þá getið þið skoðað fyrri matseðla hér. Þessi vika mun hins vegar bjóða upp á svo margt gott og ég veit ekki hvort ég geti beðið eftir japanska kjúklingasalatinu fram á föstudag. Namm!

Mánudagur: Fiskur í okkar sósu er réttur sem ég fæ ekki leið á.

Þriðjudagur: Það er orðið allt of langt síðan ég eldaði lasagna með rjómakremi og það kemur því ekki degi of snemma á matseðilinn. Uppskriftin er drjúg og það verður alltaf smá afgangur til að hita upp daginn eftir.

Miðvikudagur: Ég er ekki mikið fyrir grjónagraut en krakkarnir elska hann. Ég hef ekkert fyrir þessum ofnbakaða grjónagrauti og nýti tækifærið til að bjóða þeim upp á hann þegar ég veit að ég mun geta fengið mér afgang frá kvöldinu áður.

Fimmtudagur: Brauð með ítalskri fyllingu. Ég elska brauð og því kannski engin furða að ég fæ ekki nóg af þessari dásemd.

Föstudagur: Japanskt kjúklingasalat þykir mér vera ljúffengur endir á vinnuvikunni. Brjálæðislega gott!

Með helgarkaffinu: Sænsk kladdkaka með vanillurjómakremi og jarðaberjum svíkur engan.

Vikumatseðill

apríl 6, 2014október 1, 2020 ~ Svava ~ Skrifa athugasemd

Þá er enn ein vikan liðin og eins og svo oft áður nýti ég sunnudaginn í að skipuleggja komandi viku. Ég fer yfir það sem er að gerast hjá okkur í vikunni, naglalakka mig og geri vikumatseðil. Hápunktur líðandi viku var þegar við Gunnar gengum á Grimmansfell með vinnufélögum mínum. Gunnar er svo ótrúlega duglegur í fjallgöngunum og mér þykir svo gaman að hafa hann með. Þetta er ómetanleg gæðastund þó að mig langi oft á tíðum til að gefast upp og snúa við á miðri leið! Það er alltaf jafn góð tilfinning að ná toppnum og enn betri að klára göngurnar.

Ég er stundum spurð af því hvort að ég fari eftir þeim matseðli sem ég birti hér á síðunni. Svarið er já og nei. Ég fer eftir honum að hluta til. Ef ég fylgdi þessum matseðlum þá kæmi aldrei neitt nýtt inn á bloggið! Ég geri því matseðil fyrir mig og geri síðan annan byggðann á mínum fyrir bloggið. Ég vona að þeir nýtist ykkur og létti undir í hversdagsamstrinu.

Mánudagur: Mig langar að byrja vikuna á ofnbökuðum fiski í paprikusósu.

Þriðjudagur: Pestóbaka með bökuðu grænmeti er bæði falleg og góð. Hún stendur vel ein og sér en gott salat fer vel með.

Miðvikudagur: Mexíkósk kjötsúpa er fjölskylduvæn og tekur ekki langan tíma að útbúa. Ég ber hana fram með sýrðum rjóma og nachos eða góðu brauði (þar kemur New York Times-brauðið sterkt inn) og allir verða glaðir.

Fimmtudagur: Pylsur í þunnbrauðsvefju er bæði einfalt og gott. Heimagerður skyndibiti eins og þeir gerast bestir!

Föstudagur: Satay kjúklingasalat hefur lengi verið í uppáhaldi hjá krökkunum. Hollt, gott og æðislegt í alla staði.

Með helgarkaffinu: Ég er veik fyrir sítrónukökum og finnst sítrónukakan frá Starbucks æðisleg.

Vikumatseðill

mars 23, 2014október 1, 2020 ~ Svava ~ Skrifa athugasemd

Á þriðjudaginn er vöffludagurinn í Svíþjóð og ég verð seint þekkt fyrir að láta svo gott tilefni til að borða vöfflur framhjá mér fara. Mér þykja vöfflur æðislega góðar og baka þær oftar en góðu hófi gegnir. Uppskriftin sem ég nota oftast er hér. Þó að vöfflur með þeyttum rjóma og góðri sultu standa alltaf fyrir sínu þá getur verið gaman að breyta til og bera vöfflurnar t.d. fram með Nutella og bönunum eða sem eftirrétt með góðum ís, ferskum berjum og heitri súkkulaði- eða karamellusósu.

Það eru engar vöfflur á matseðli vikunnar en þar má þó finna eitt og annað gott. Ég fékk tölvupóst frá lesanda um daginn sem ætlaði að gera rjómalöguðu kjúklingasúpuna og mig hefur langað í súpuna síðan. Hún fór því beint á vikumatseðilinn. Eins þykir mér mexíkóska lasagnað hennar Nigellu æðislegt og góður endir á vinnuvikunni.

Mánudagur: Mér þykir fiskréttur með blaðlauk og sveppum passa vel eftir helgarmatinn.

Þriðjudagur: Skinku- og spergilkálsbaka er létt og góð máltíð sem ég ber fram með salati.

Miðvikudagur: Ljúffeng rjómalöguð kjúklingasúpa sem lífgar upp á hversdagsleikann.

Fimmtudagur: Þessi bragðgóði pylsupottréttur með beikoni og sweet chili rjómasósu gleður okkur alltaf.

Föstudagur: Þetta mexíkóska lasagna með avokadó-salsa er réttur sem ég hef oft gripið til þegar ég á von á gestum. Það er hægt að undirbúa hann deginum áður og þá er lítið mál að hóa í vini í mat eftir vinnu á föstudegi. Rétturinn vekur alltaf lukku.