Ég tók eftir því að þessi vikumatseðill er númer 54 í röðinni, sem þýðir að á blogginu má nú finna matseðil fyrir hverja viku ársins og rúmlega það. Þið finnið þá auðveldlega með því að skrifa vikumatseðill í leitina hér hægra megin á síðunni. Þá koma þeir allir upp. Og enn bæti ég í safnið, með enn einum vikumatseðlinum!

Vikumatseðill

Mánudagur: Fiskur í ljúffengri sósu

Þriðjudagur: Skinku- og spergilkálsbaka

Miðvikudagur: Rjómalöguð kjúklingasúpa

Fimmtudagur: Pasta með beikoni, sveppum og sólþurrkuðum tómötum

Föstudagur: Heimsins besta Sloppy Joe

Með helgarkaffinu: Mjúk súkkulaðibitakaka með súkkulaðismjörkremi

Pinterest síða Ljúfmetis hefur fengið litla ást og umhyggju frá mér undanfarin misseri. Það bara fór þannig alveg óvart, eins og ég hafi gleymt henni. Í vikunni bætti ég upp fyrir sinnuleysið þegar ég sat heilt kvöld, fór yfir allar bloggfærslur þrjú ár aftur í tímann og flutti uppskriftirnar yfir. Núna ættu því flest allar uppskriftirnar að finnast á Pinterest síðunni.

Á meðan ég sat yfir þessu og fletti í gegnum hverja bloggfærslunna á fætur annarri varð ég svo glöð yfir að eiga svona mikið af minningum skrásettar. Myndir frá ferðalögum, sögur af hversdagsleikanum og prjónaverkefni eru fáein dæmi. Og að því sögðu má ég til með að setja inn nýjasta prjónaverkefnið sem var sængurgjöf til sonar vinkonu minnar, húfa (uppskriftin er hér) og sokkar. Prjónaandinn virðist helst koma yfir mig á þessum árstíma og nú er ég komin með nýtt verkefni á prjónana, lopapeysu sem Malín bað mig að prjóna handa sér. Ég hef svo gaman af þessu að ég fór í gær og keypti uppskrift að annarri peysu, sem ég ætla að prjóna handa mér. Nú er bara að sjá hvenær ég næ að klára þetta allt.

Vikumatseðill

Mánudagur: Mexíkófiskur

Þriðjudagur: Parmesanbuff í rjómasósu

Miðvikudagur: Mögulega besta tómatsúpa í heimi

Fimmtudagur: Pylsupottréttur með beikoni og sweet chili rjómasósu

Föstudagur: Steiktar quesadillas með kjúklingi

Með helgarkaffinu: Extra mjúkir kanilsnúðar

Í lok júlí fór Jakob í vikuferð til Finnlands í sumarbúðir. Á meðan var ég eins og vængbrotinn fugl hér heima en hann upplifði bestu daga lífs síns. Það sem hann skemmti sér vel og þrátt fyrir að við settum ferðafrelsi á símann hans heyrðist varla frá honum þessa vikuna. Eftir langa viku sóttum við Gunnar hann á Leifsstöð þar sem við fengum að bíða í klukkutíma áður en hann lét sjá sig.

Jakob kom færandi hendi, með gjafir handa öllum. Ég fékk nýjan mumminbolla í safnið sem ég elska og varð strax uppáhalds bollinn minn!

Í fjarveru Jakobs nýttum við Gunnar góðviðrið einn seinnipartinn í göngu í Esjunni. Vissuð þið að ef farið er út fyrir stígana og ekki hefðbundna leið upp að steini þá má finna vilt jarðaber og hindber? Við höfðum ekki gengið lengi þegar við sáum lítil en bragðgóð jarðaber sem við týndum upp í okkur.

Þegar við komum niður rákumst við á þennan fallega hund sem býr á svæðinu. Okkur langaði að eiga hann.

Það er orðið þónokkuð langt síðan ég setti inn vikumatseðil og þar sem margir eru að detta í vinnu aftur eftir sumarfrí þá getur verið gott að skipuleggja matarvikuna og gera stórinnkaup, því hver nennir í búðina eftir vinnudaginn þegar manni langar mest til að vera heima í sumarfríi? Ekki ég. Hér kemur því sumarlegur matseðill sem gefur veislu alla vikuna!

Vikumatseðill

Mánudagur: Pönnusteiktur þorskur með sætum kartöflubátum og basilikumajónesi

Þriðjudagur: Grilluð BBQ-pizza

Miðvikudagur: Japanskt kjúklingasalat

Fimmtudagur: Parmesanbaka með spínati og kirsuberjatómötum

Föstudagur: BBQ-hamborgarar með karamelluhúðuðum rauðlauk og hvítmygluosti

Með helgarkaffinu: Torta di Pernilla

Það er óhætt að segja að það rættist úr 17. júní veðrinu. Okkur var boðið í grill um kvöldið til vinafólks okkar, Kristínar og Rikka. Rikki átti afmæli fyrr í vikunni og fékk ginflöskuna hér að ofan í síðbúna afmælisgjöf frá okkur. Þar sem veðrið var svo gott ákváðum við að borða úti á palli hjá þeim og enduðum á að sitja þar fram eftir kvöldi. Það er nú ekki á hverjum degi sem það er hægt, en mikið er ljúft þegar það gerist. Sól, grillmatur, hvítvín og góður félagsskapur, það gerist varla betra. Þegar leið á kvöldið var hvítvíninu skipt út fyrir G&T og áður en við vissum af var liðið langt fram á nótt. Það má jafnvel segja að það varð aðeins of mikið af ljúfa lífinu hjá okkur þarna um kvöldið og laugardagurinn fór svolítið í það að jafna sig. Maður er víst ekki tvítugur lengur. Í dag erum við hins vegar eldhress, verkfræðingurinn á leið í vinnuferð til Hollands og ég ætla að kíkja aðeins í Smáralindina. En fyrst kemur hér, eins og svo oft á sunnudögum, hugmynd að vikumatseðli.

Vikumatseðill

Mánudagur: Ítalskur lax með fetaostasósu

Þriðjudagur: Einfalt og stórgott lasagna

Miðvikudagur: Sveppasúpa

Fimmtudagur: Parmesanbuff í rjómasósu

Föstudagur: Kjúklingaborgari

Með helgarkaffinu: Drømmekage

Fyrir utan heimsókn á læknavaktina í gærmorgun (sem betur fer var lítið að gera þar, enda hálf þjóðin í Color run) sem endaði á sýklalyfi, ofnæmislyfi og sterakremi, þá hefur helgin verið sérlega góð. Hápunktur helgarinnar var klárlega gærkvöldið, þegar við fórum með mömmu og Eyþóri bróður mínum á Bjórgarðinn í drykk og léttan kvöldverð og síðan yfir í Borgarleikhúsið á Mamma Mía. Þvílík sýning! Við skemmtum okkur stórkostlega og erum enn í skýjunum. Ég segi bara ekki láta hana framhjá ykkur fara!

Vikumatseðill

Mánudagur: Fiskur í ljúffengri sósu

Þriðjudagur: Brokkólí- og sveppabaka

Miðvikudagur: Laksa með kjúklingi

Fimmtudagur: Pasta með salami, ruccola, furuhnetum og parmesan

Föstudagur: Dásamlegur BBQ-kjúklingur með öllu í einum pakka!

Með helgarkaffinu: Sítrónukaka með kókos

Mæðradagsblómin frá Malínu standa einn og það kæmi mér ekki á óvart ef þau munu lifa út næstu viku líka. Ég elska afskorin blóm og vil helst alltaf vera með vönd hér heima. Með blómunum frá Malínu fylgdi sætur bangsi, meira krúttið sem hún er þessi skotta mín (sem varð 18 ára og sjálfráða á dögunum! Það sem tíminn líður…).

Í ljósi þess að í gær var Eurovision og í dag er hvítasunna grunar mig að margir geri vel við sig í mat þessa helgina. Hér er alla vega sá hátturinn á. Ég ætla því að halda mér við mánudagsfiskinn á morgun, en þar sem þá er annar í hvítasunnu ætla ég að draga fram góðu laxuppskriftina frá mömmu. Þar slæ ég tvær flugur í einu höggi, fæ bæði veislumat og fisk, og veit að allir verða ánægðir.

Vikumatseðill

Mánudagur: Lax með mango chutney og pistasíuhnetum

Þriðjudagur: Chili con carne

Miðvikudagur: Afgangur frá þriðjudeginum settur ofan á pizzabotn

Fimmtudagur: Pasta með púrrulauk og beikoni

Föstudagur: Kjúklingur í ostrusósu

Með helgarkaffinu: Mjúk kaffikaka með súkkulaðibitum og kanil

Ný vika framundan sem er upplagt að skipuleggja með því að gera matseðil og stórinnkaup. Það er jú fátt eins þreytandi og að rölta um matvörubúðina eftir vinnu og reyna að fá hugmynd að einhverju til að hafa í kvöldmat. Þá vil ég frekar gefa mér smá tíma á sunnudegi í að plana vikuna og þurfa síðan ekki að hugsa um það meir!

Vikumatseðill

Mánudagur: Fiskur með beikoni og eggjasósu

Þriðjudagur: Tacobaka

Miðvikudagur: Kjúklingasúpa með tómötum, karrý og epli

Fimmtudagur: Pylsupottréttur með beikoni og sweet chili rjómasósu

Föstudagur: Grilluð humarpizza

Með helgarkaffinu: Sænskar pönnukökur

Þá er enn ein vikan að enda og ný bíður. Sunnudagar hjá mér þýða oftast langur morgunverður, göngutúr, nýtt naglalakk, vikuinnkaup og vikumatseðill. Þetta er ekki flókið en eftir þetta getur vikan ekki annað en byrjað vel!

Vikumatseðill

Mánudagur: Lax með mango chutney og pistasíuhnetum

Þriðjudagur: Parmesanbuff í rjómasósu

Miðvikudagur: Pulsu- og makkarónuskúffa

Fimmtudagur: Tacos með rauðum linsubaunum

Föstudagur: Tortellini í brúnuðu salvíusmjöri

Með helgarkaffinu: Nutellakökur

Gleðilegan valentínusardag! Það eru skiptar skoðanir á valentínusardeginum hér á Íslandi en ég tek öllum tækifærum til að gera mér dagamun fagnandi. Hér heima er verið að draga rafmagn í nýja innstungu því ég fékk þá hugmynd að það væri fínt að hafa lampa í nýju bókahillunni. Það var þó engin innstunga nálægt hillunni og því er verið að bjarga núna. Á meðan nýti ég tækifærið og undirbý vikumatseðil og ætla síðan að hendast í búðina að gera vikuinnkaup. Síðan er bongóblíða úti og því upplagt að viðra sig. Fyrir mig liggur leiðin annað hvort í góða göngu eða upp í fjöll. Það verður að nýta þessa fallegu vetrardaga!

Vikumatseðill

Mánudagur: Ofnbakaður fiskur í paprikusósu

Þriðjudagur: Kjötbollur með mozzarella og basiliku

Miðvikudagur: Spaghetti með ofnbökuðu beikoni í hvítlauksolíu

Fimmtudagur: Kjúklingur með karamelluhúðaðri papriku í mangó chutney sósu

Föstudagur: Fylltar tortillaskálar

Með helgarkaffinu: Heslihnetuvöfflur með berjakompóti og léttu rjómakremi

Eftir að ég birti uppskrift að pankohúðuðum kjúklinganöggum hef ég reglulega fengið fyrirspurnir um hvar Panko fáist á Íslandi. Þá hafði ég keypt það í Hagkaup í Smáralind en þegar ég ætlaði að kaupa meira var það búið. Síðan þá hef ég svipast um eftir því í nánast hverri búðarferð sem ég fer í og það var svo loksins í gær að ég sá ég Panko aftur, núna í Hagkaup í Skeifunni. Ég má því til með að benda áhugasömum á að það fæst þar (alla vega þessa stundina, vonandi er það núna komið til að vera). En að máli málanna, vikumatseðlinum!

Vikumatseðill

Mánudagur: Fiskur með beikoni og eggjasósu

Þriðjudagur: Asískar kjötbollur

Miðvikudagur: Quiche Lorraine

Fimmtudagur: Kjúklingagratín með tómat- og ostasósu

Föstudagur: Tacopizzubaka

Með helgarkaffinu: Sænskar pönnukökur